БНСУ-ын Хууль зүйн яамнаас гаргасан статистик мэдээнээс үзэхэд 2015 оны 2 дугаар сарын байдлаар БНСУ-д Монгол улсын 24,755 иргэн /эрэгтэй-13021, эмэгтэй-11.734/ оршин сууж байгаагаас хөдөлмөрийн гэрээний E9 визний ангилалтай 7813 иргэн /эрэгтэй-6585, эмэгтэй-1228/, их дээд сургууль, хэлний бэлтгэлд суралцагч 3,744 оюутан тус тус оршин сууж байна.
Мөн тус улсын иргэдтэй гэрлэсэн нийт 2,379 иргэн /эрэгтэй-81, эмэгтэй 2,298/ байна. 2014 онд Солонгос улсын иргэншил хүссэн Монгол улсын 120 иргэний 13-д нь иргэншил олгосон бөгөөд энэ он гарсаар 14 иргэн тус улсын иргэншил авах хүсэлтээ тавьсан байдалтай байгаа аж. Дээрх тооны иргэдээс Чонан хотод 400 орчим Монгол иргэн (энэ нь зөвхөн хууль ёсоор оршин сууж буй иргэдийн тоо) байдаг байна.
Тухайн хотыг онцлохын учир нь БНСУ-ын Чонан хотын Гадаадын ажилчдыг дэмжих төв болон Нийгмийн хамгааллын үйлчилгээний төв хооронд тус улсад оршин сууж буй Монгол иргэдэд нийгмийн хамгааллын үйлчилгээ үзүүлэх, хөдөлмөр болон цагаачлалын тухай хууль тогтоомжтой холбоотой асуудал зэрэгт хамтран ажиллах, мэдээлэл солилцох, сургалт зохион байгуулах чиглэлд хамтран ажиллахаар тохиролцож, санамж бичгийн гэрээг үзэглэсэн юм. Гэрээнд БНСУ-ын Хөдөлмөрийн яамны харъяа Чонан хотын Гадаадын ажилчдыг дэмжих төвийн захирал Ким Жүн Сү, Монголын талаас ХАХНХЯ-ны харьяа БНСУ дахь Нийгмийн хамгааллын үйлчилгээний төвийн дарга Ц.Өнөрзаяа нар гарын үсэг зурав.
Тус төв нь зөвхөн хууль ёсны гэлтгүй хууль бусаар оршин сууж байгаа иргэд болон бусад ойролцоо хотуудад оршин сууж буй иргэдэд хүртэл хүрч үйлчилдгээрээ онцлогтой. Цалин хөлсөө авч чадахгүй байгаа болон хууль бусаар халагдсан, хөдөлмөрийн аюулгүй ажиллагааны улмаас гэмтэж бэртсэн иргэдэд зөвлөгөө мэдээллийг түргэн шуурхай өгч, яаралтай арга хэмжээ авахад тусалдаг албан ёсны энэхүү байгууллага ХАХНХЯ-ны харьяа БНСУ дахь Нийгмийн хамгааллын үйлчилгээний төв хамтран ажиллах болсноор иргэдийн нийгмийн хамгааллыг сайжруулах чиглэлд ахиц гарна гэж үзэж байна.
