ЭРҮҮЛ МЭНД, НИЙГМИЙН ДААТГАЛЫН ЕРӨНХИЙ ГАЗАР
ДААТГУУЛАГЧ ТАНД ҮЙЛ АЖИЛЛАГААГАА ТАЙЛАГНАЖ БАЙНА
Засгийн газрын үйл ажиллагааны хөтөлбөрт нийгмийн даатгалын үйлчилгээг иргэдийн хэрэгцээ шаардлагад нийцүүлэх, хүн амын зорилтот бүлэгт чиглэсэн нийгмийн даатгалын бүтээгдэхүүн, үйлчилгээг өргөжүүлэх, чанар, хүртээмжийг дээшлүүлэх, нийгмийн даатгалын хууль эрхзүйн орчинг даатгуулагчид ээлтэй байдлаар өөрчлөх, эрүүл мэндийн тусламж, үйлчилгээний чанарын хяналтыг сайжруулах, эрүүл мэндийн зардалд иргэдийн өөрөөсөө төлж байгаа төлбөрийн дарамтыг бууруулахад чиглэсэн асуудлууд тусгагдсаны дагуу Хөдөлмөр, нийгмийн хамгааллын яам, Эрүүл мэнд, нийгмийн даатгалын ерөнхий газраас дараах үйл ажиллагааг зохион байгуулж хэрэгжүүлснээ иргэд, даатгуулагч, ажил олгогч, харилцагч талууддаа тайлагнаж байна.
Нийгмийн даатгал нь ажил олгогч, даатгуулагчдын төлсөн шимтгэлийн орлогоор нийгмийн даатгалын сан бүрдүүлээд даатгуулагчдад нийгмийн шинжтэй эрсдэл тохиолдох үед нь тэтгэвэр, тэтгэмж, төлбөр, зардал, хөнгөлөлт олгох хэлбэрээр үйлчилгээ үзүүлэх нийгэм, эдийн засгийн арга хэмжээ юм.
2016 оны жилийн эцсийн байдлаар нийгмийн даатгалд 43.1 мянган ажил олгогч, 2.9 сая иргэнийг хамруулж, Монгол Улсын нэгдсэн төсвийн 25%-ийг бүрдүүлж, нийгмийн даатгалын санд 1.3 их наяд төгрөгийн орлого төвлөрүүлэн, 1.7 их наяд төгрөгийн зарлага санхүүжилтийг хийж, давхардсан тоогоор 6.3 сая хүнд нийгмийн даатгалын 30 гаруй нэр төрлийн үйлчилгээ үзүүлж байна. Үүнээс 373.0 мянган иргэнд сар бүр гурван төрөл (өндөр нас, тахир дутуу, тэжээгчээ алдсаны)-ийн тэтгэвэр олгож байна. Дундаж тэтгэврийн хэмжээ 310.7 мян.төг, бүрэн тэтгэврийн доод хэмжээ 251.0 мян.төг, хувь тэнцүүлсэн тэтгэврийн доод хэмжээ 216.0 мян.төг байна.
Энэ онд нийгмийн даатгалын санд 1.4 их наяд төгрөгийн орлого төвлөрүүлж, 1.9 их наяд төгрөгийг даатгуулагчдын тэтгэвэр, тэтгэмж, төлбөрт зарцуулахаар төлөвлөж байна.
НИЙГМИЙН ДААТГАЛЫН САНГИЙН ХӨРӨНГӨ 38.8 ТЭРБУМ ТӨГРӨГӨӨР ӨСӨХ БОЛОМЖ БҮРДЛЭЭ
Нийгмийн даатгалын үндэсний зөвлөлийн 2016 оны 33 дугаар тогтоолоор нийгмийн даатгалын сангийн мөнгөн хөрөнгийн чөлөөт үлдэгдлээс арилжааны банкуудад байршуулсан мөнгөн хадгаламжийн нэг жилийн хүүгийн хэмжээ 9 хувь байсныг 15.0 хувиас доошгүй байхаар шинэчлэн тогтоосон байна. Өнөөдрийн байдлаар арилжааны 9 банкинд 597.0 тэрбум төгрөгийн хадгаламж жилийн 15.0-15.5 хувийн хүүтэйгээр байршиж байна.
Энэхүү тогтоол хэрэгжснээр нийгмийн даатгалын санд хадгаламжийн хүүгийн орлого 90.7 тэрбум төгрөг болж жилийн хадгаламжийн хүүнээс орох орлого 38.8 тэрбум төгрөгөөр буюу 74.7 хувиар нэмэгдэх боломж бүрдлээ.
